Baskadia

NGURTE HLUO DAN

1900s chawhnung tieng khan tlangramah mautam tram a nasa em ema, an tlang lova bu hai khom zan khat thil thuin mazu-in? an inram hmak hmak el a nih. Chuongchun  Kanan tram pur do zo lova Jakob a nauhaiin an hmusit em em Aigupta ram tieng ration lak dinga vai vawi ang hlola inranga an vuong suk ang khan Pherzawl (Mizorama khuo Ngur khuo anthawka hung an  nih)khuo a inthawkin ka pu Vawmkaithang le a sunghai, Leisen khuoa inthokin Hleia( Zathruoia pa), Parvachawm le Mizoram khuo hran hran hieng- Khawlek, Vanbawng, Ngur khuo a inthawkin an hung an nih, ka Pu Vawmkaithang hi a nu rawia hung anna, 1907 vela hung kai nia hriet a nih. anni hnung, kum khat hnungah Pu Hleia (tuta ei khaw lal Darsanglien a pu hai an hung kai. Sungkhat, mautam tram beidawng leia hung inthawk suok an nih. Hi hung khawm hai hi ramtina inthawka hung khawm, Ngaidiphul an lo ti,tuta Thingkangphai khuo umna laia umhmun khuor le intawng khawm anni leiin ''ruolthar'' ka hang ti kher a nih. Chuong hun lai chunThingkangphaia khin tu khom an la um noh. Lal Semthong a ram vong a nia, Meetei Reng (lal) leh an inbiek thei leiin ram lien tak a lo sat huola, tu um khawm a phal noh. Kum hni lai an um hnungin Zongtra Buk (tuta Kawnpui khuo)a khin an um nawka. Lal Semthongin Rengpa kuomah a hek hlak leiin Tuolpui tlang (lentlang)ah an insawn kaia, chu zo chun Lungbuk (Thenmuol khuo sak lai)ah an um nawka, chuzova ei NKP hi an sat a nih.

Mautam tram a nasa em leia hung inpema khuo sat annia, a sattu hai hi sung le kuo, unau inhnai tak tak anni tawl. NKP an hluo tran laia lal dinga an ruot chu Pu  Thrieuva a nia, sienkhom tuihri leiin a nuhmei le nauhai an thi vonga, Pu Vawmkaithang hai an hang ti nawk leh, a unauhai Pu Ngur le Pu Khum an thi nawka, a mal em leiin la lovin anni sungkuo laia mi tho Pu Zathruoi apa Pu Hleia'n chu lal nina an pek ta a nih. chuonglai chun ei NKP khom hi Rengpui rama sal a ni leiin Patta chungthuah  buoina la um zing thei a nia, a vangneia siemin Ka Pu Vawmkaithang khan vapuolte a mana, chuonglaia SDO chu Gesparsap a nia, ka pu chun a va peka, ei khuo patta khom chu a lo sukfel pek ta a nih. Gesparsap hi tuta Tuiteng tlang suka Gesparkai ei ti lo insattirtu a ni leiin tuchen hin ama hming a put sawng an tah. Gesparsap hin Tuiring/Tuining? tieng a Thadou um hai infepawna dinga Gesparkai khi lam dinga a lo insattir a nih.

Hieng hun lai hin CCpurah tukhom an la um nawa, rampui hring dup, sa chi tin chengna a la nih. Lamka sulsutu Zenhang meu khoma a la hluo noh. Ngurte khuo sat zo hnung kumthumaah Khawpuibung khuo saw Mizorama inthawka hung sungkuo pahni pathumin an hung sat tran ve a nih.
Chuong hun lai chun Tuithraphai hi '' a chung bu, a hnuoi nga'' tia lo hriet hlak a nih.
Ka lawm ie. NKP zindabad!
10042012j&k